voor den tyt van ses ofte zeven jaeren, ende by tyden van hem die spreect ende heeft die bouwerye ende anders dat van de proste dependeert zeer wel geregeert, daer deur hy oeck in goede recommendacie was by wylen den prelaet Malsem. Seit dat den jegenwoirdigen proost broeder Lambrecht van Wamele die nutste nochte bequaemste nergens nae en is totter deserviture van de proestye, ende dat die bouwerie by zynen tyt zeer verachtert is, ende dagelycx meer ende meer declineert, daer tprincipael welvaeren van den convente nochtans anhanget, ende is de selve proost zeer costelyck dickwils oeck hoeck drinckende. Gevraecht opte persoen van broeder Dierck Spierinck pastoor in Outheusden, seyt dat de selve Spierinck inden convente egeen weerlyck bewint ende administracie gehadt en heeft alsoe als hy prior ende supprior geweest is, dan geeft zyne cure ende die goeden daertoe beboerende zeer wel geregeert, als hy noch dagelycx doet, sulcx dat die grootelyck verbeetert werdden ende die cure te voeren compt. Seyt dat de selve Spierinck een clouck sober man is, die tzyn wel can houden ende bewaeren, dat daeromme nae zynen beduncken hy Spierinck d abdie beeter soude regieren ende administreren dan broeder Lambrecht jegenwoirdich proost om redenen voorscreven. Ende onder staet gescreven Nescit scribere.

'29. Aert van Asperen out ontrent LI jaeren gehoirt ende gevraecht opte naevolgende poincten ende articlen. Seyt ende verclaert by zynen eede als hy liyer nae volcht, in den eersten dat hy inder abdie gewoent heeft by tyden wylen heer Gillis Nuwelandt abt ende hem gedient als camerlinck den tyt van twee jaeren, daer nae heeft hy oick gewoent by heer Coenraet van Malsen ten tyde hy was pastoer van Barlecom ende coadjutor van der abdie, ende daer nae is gewerden congierge in de herberge van Beern Tsertogenbossche, ende in de lande van Ravesteyn, als hy oick alsnu is ende