mercken werdt die religie redelyck wel bewaert ende onderhouden inde voorscreven convente dan soude verhoepen dattet beter gaen soude indien daer een lector ofte professor geordonneert ende gestelt werdde tot leeringe ende onderwys van den jongen ende andere religieusen, die daer deur affgetrocken souden werdden van drincken ende leechgaen ende soude eenen cleynen cost vallen voorde abdie nadvenant tgoet ende tprouffyt ende goede stichtinge die daer deur inder abdie zoude coemen.

Ondergescreven Fr. Henricus Buren de Novomagio curatus in Engelen.

13. Broeder Wilhelmus van E r p out ontrent XLVII jaeren prepositus in Monickevoort alias Oltvorst gelegen tusschen Maes ende Wael . . . voor de eerste ende bequaemste soude kiesen tot abt broeder Theodoricus Spierinck . . . die een goet eerlyck heer is, matelyck out, als ontrent XL jaeren, ende is geweest supprior ten tyde hy die spreect prior was in der abdie, is oeck de selve Spierinck daer nae selfs prior geweest, ende heeft hem int bedienen van sijn officien altyts eerlyck ende wysselyck gedraegen, verstaet hem oick wel t regiment van weerlycke saecken, twelck wel gebleken is int bedienen van priorscip, ende daernae int bewaeren van de cure van Outheusden, die hy seer verbetert ende te voeren gebracht heeft binnen den tyt van ses ofte zeven jaeren, daer die van te voeren grootelyck verargert ende ten achter geset was. Seyt dat broeder Gerardus Balen prepositus in Hontswyck oeck een goet devoet heer ende religieux is, die hy die spreect mede verstaet gequalificeert te wesen om abt geconstitueert te werdden, want hy geweest is eertyts proest ende pietanciarius van der abdie, int bedienen van welcke officien hy hem wel ende deuchdelyck gequeten heeft. Seyt voor den derden dat broeder Henricus Buren pastor in Engelen oeck een eerlyck religieux is die diversche officien inder abdien bedient heeft als geweest zynde magister noviciorum