Kinnerspul
door J. H. Bergmans-Beins
Tellengs volk wassen hen Holtman zienent op Neij’aorsvesiet en now was bij Telleng krediet. Grietien heur meid en Haarmtien van Holtman, die zullen op ’t hoes passen. En Jannao Germs, die kammeroad met heur was, kwaamp ok ’n toertien. Um aacht uur, half negen mussen d’ kinner hen bedd’.Totzoo laank kunnen de wichter zuk wal met heur vemuvem.
Zie zaten met ’n allen um d’ taofel en Gerriet ’n breur van Leffert Telleng, die nog vrijgezel was, zat bij ’t vuur en trok an de piep.
Grietien had kowie maakt met sukker en kniel d’r in. Met wat veul melk kregen de kinner d’r ok ’n koppien van. Jaorskoeken en plassies en ’n stuk aold wief kreeg’n z’ d’r bij.
De wichter wassen an ’t breiden, maor al gaauw keken zie naor d’ kinner, die met ’n nulliesholtien speulden, en vergaten zie heur wark.
Zie deden um „diggels” en Derk gooide aalmaor „krieger-ien” of altemaol en Marchien mus aal maor ien bij lekgen of gooide „nullies”. Marchien wuer helleg en wol niet langer.
„Kwan” zee Grietien, „laot oes ok is met doen”.
Doe kwaamp Gerriet d’r ook bij en kreeg elk ’n hoopien diggels en doe um beurten gooien.
Now was Marchien beter te broeken, want zie gooide „altemaol” wat heur biester anstun.
„Jao” zee Gerriet, „zoo giet, a’j wint is ’t goed, maor a’j verliest dan reer ij”. Maor gooien dat is gien kunst, daor huuft gien verstaand bij. Moe’j is „ruter op peerd” doen dan moe’j nog raon”.
Dat gxmk an. Gerriet kreeg wat diggels in d’ haand en Marchien mus raon. „Ruter op peerd” zee Gerriet.
„Lös loopen” zee Marchien.
„Hoeveul manies”?
„Zeuven” zee Marchien.
Gerriet dee d’ haand lös en hadd’ d’r vief in. Marchien mus d’r zeuven van maken en dee d’r tweej bij.
Now was Marchien an beurt en mus Haarmtien raon. Die zee veer en Marchien, die negen in ’d haand hadd’ mus heur vieve geven.
„Dat was beid’ keeren mis” zee Gerriet. „Marchien kent er niet veul van. ’k Zal is ’n raodsel opgeven”.